LIMBANG, 1 September: Kaban Parlimen Limbang, Datuk Hasbi Habibollah ngansak Opis Menteri Pengerai Malaysia (KKM) ngelengkaska kereja ngangkatmanah Sepital Limbang ke baru ti udah dikemendarka sebedau tu.
Iya madah, perengkaguna sepital ke baru nya beguna amat laban Sepital Limbang udah bisi lapan iku tebangkar lalu begunaka perengkaguna begunan tauka Kompleks Sepital Pakar ke lebih meruan.
“Pasal peminta begunan pakar tu kitai udah minta. enti enda salah aku sigi udah bisi dalam rintai. Reti nya semina nanya kemaya deka ngaga, siti aja ke ditemu aku ditu iya nya kitai udah bisi lapan tebangkar tang diatu suntuk bilik ungkup tebangkar tu.
“Enti ulih ungkup timpuh pandak, ngarapka Opis Pengerai meri agih belanja dikena ngaga bilik tu ungkup tebangkar tu,” ku iya
Hasbi ke mega Sapit Menteri Pengangkut ngarap KKM ulih nyendiaka agih belanja tambah ungkup ngaga bilik pakar Sepital Limbang ti enda chukup nampung guna nya maya diatu.
Ba awak ke sama , Sepital Limbang ngembuan lapan servis pakar iya nya , pakar nembiak mit, pakar perubat, pakar psikiatri, perengkaguna pakar sakit indu, pakar radiologi, pakar buntas, pakar bius enggau pakar tulang.
Ngelansa pasal Klinik Pengerai Limbang ku iya, taba ungkup ngaga klinik tu udah dikelala ba kandang mengeri baru Limbang enggau fasiliti nya beguna amat ungkup pengelantang peranak di utara nengeri tu.
Nangkan ke nya, pasal Klinik Pengerai Nanga Medamit ku iya, siti surat peminta deka dikenataika ngagai Petronas ngambika klinik menua pesisir ulih digaga ba baruh CSR ejensi korporat nya, berindik ari klinik nya maya diatu berisiko ulih kena penusah tanah tusur.-TVS