KUCHING, 19 Ogos: Pengerami Ngintu Hari Kebangsaan nyadi kelai pemansang sereta pengelikun menua tu, ku Menteri ba Opis Premier Sarawak ke mega bekuasa ngatur Hari Kebangsaan 2024 Renggat Sarawak, Dato Sri John Sikie Tayai.
Ku iya madah, berambaika jaku “Malaysia Madani: Jiwa Merdeka” chukup nemban nyadi kelai penyerakup rayat pupu bansa di menua tu.
“Tu nemban bendar ke alai lebih agi di Sarawak laban rayat selampur Sarawak idup begulai enda ngira bansa, pengarap enggau asal penatai enggau tu endang mandangka kitai idup dalam pemaik di Sarawak,” ku iya.
Iya madah munyi nya lebuh dirandau pemberita sepengudah nemuai meri basa ngagai Tuai Pemegai Menua Sarawak Tun Pehin Sri Dr Wan Junaidi Tuanku Jaafar di Astana Nengeri Sarawak, Hari Satu tu tadi
Pengawa nemuai meri basa tu dikena ngundang tuai pemegai menua sereta bini iya ngulu pengerami ngintu Hari Kebangsaan Renggat Nengeri Sarawak 2024 di Sibu, kena 31 Ogos tu ila.
John Sikie mega madahka pengawa milih Sibu nyadi tuai rumah nemban bendar ukai semina ketegal palan iya ti strategik tang mega menua Sibu tu bepalan ba tengah-tengah nengeri, lalu tu ulih nyadika kelai penyerakup sereta pemaik entara pupu raban bansa.
Mayuh aktiviti deka diatur nyengkaum program Ambang Hari Kebangsaan, Fun Walk Hari Kebangsaan sereta Aum Hari Kebangsaan.-TVS