BETONG, 18 Ogos: Komiti Nembiak Parti Pesaka Bumiputera Bersatu (PBB) udah deka ngenegapka agi program-program parti dikena ngaul komuniti lebih agi raban orang biak ba renggat baruh.
Sapit Tuai Nembiak PBB Sarawak Allan Siden Gramong madah, sekeda program roadshow udah dilanggur deka diatur enda lama agi baka di Kapit, Bintulu enggau sitak ke bukai.
“Udah tu kitai deka ngatur program baka di Kapit, tang dini endur apin temu kebendar iya minggu baru enggau udah nya aku udah berandau enggau bala bakih bukai deka ke Bintulu sebedau nikal baru nyangka diatur ba sitak majoriti Bidayuh,” ku iya.
Allan ke mega Kaban Kunsil Nengeri (ADUN) Machan madah munyi nya maya Pengawa Randau Nembiak PBB N. 37 Bukit Saban ba Rumah Panjai Kelimbang Jaman, Penyulok Ulu Layar kemari.
Ku iya, genap kaban PBB lebih agi raban nemnbiak patut sedia gawa ke parti lalu nadai ngarapka sebarang upah.
Tandu iya, kaban parti patut lebih ngemeratka juluk parti lebih ari pemaik diri empu.
Sama bisi datai Penulung Tukang Wang Komiti Nembiak PBB Sarawak ke mega Sekretari Politik ngagai Premier Sarawak, Afiq Brahim enggau Roseline Mapong Sabai sereta ke bukai.-TVS