KUCHING, 28 Julai: Rayat Sarawak patut temegah ati pengudah udah bisi dua Taba Lanting Dunya ti diaku Serakup Pelajar, Saintifik enggau Main Asal Gempung Bansa (UNESCO) di wilayah tu.
Premier Sarawak, Datuk Patinggi Tan Sri Abang Johari Tun Openg madahka, Sarawak diatu udah bisi Taman Negara Niah ti baru diaku nyadi Taba Lanting Arkeologi Dunya lalu sebedau tu Taman Negara Mulu.
“Di Malaysia nadai kala sebuah nengeri ngembuan dua Taba Lanting UNESCO lalu tu siti pemujur ti dikemegahka Sarawak ari sukut rampa menua (Taman Negara Gunung Mulu) enggau budaya (Taman Negara Niah),” ku iya madah rambau aum media pengudah bejadika Program Nikika Menira Ibu Pertiwi ditu, sehari tu tadi.
Berebak enggau nya, iya meri pengaga ati ngagai pemujur Taman Negara Gua Niah ke udah diaku nyadi Taba Lanting Arkeologi Dunya ari Serakup Pelajar, Saintifik enggau Main Asal Gempung Bansa (UNESCO).
Pengaga nya diberi ngagai semua raban ti bebendar dalam ngemujurka misyen ngelangkar nama Sarawak ba renggat antarabansa.
Berita manah nya dipadahka Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh ngagai Abang Johari ti ngarika Sarawak ngulu aum nya di India, Hari Enam tu tadi.
Berindik ari nya, iya madahka raban iya benung merambu deka mai mayuh agi temuai datai ngelawa taba lanting tauka palan pesaka asal ke udah nerima pengaku ari UNESCO nya.
Tandu iya, siti agi pemujur ti ngemegahka Sarawak iya nya pengaku ke diberi ngagai mengeri Kuching ti nyadi taba Sarawak Delta Geopark (SDGp) sereta deka terus negapka ekonomi ba kandang menua nya.-TVS