SPAOH, 27 Julai: Industri Krafjari ngembuan penau besai dikemansang nyadi siti ari pun penatai pemisi besai peranak ba menua pesisir.
Sapit Premier Sarawak Datuk Amar Douglas Uggah Embas madah, kebuah pia laban ba sitak menua pesisir agi tubah orang indu ke landik ba bidang krafjari lebih agi baka betenun, bejait enggau ke bukai.
“Sehari tu berengkah mih kaul kitai enggau Opis Krafjari Malaysia di Betong enggau Kuching.
“Nengah tu siti pun penatai pemisi ke ulih dikemansang ba menua pesisir baka bejait, betenu enggau ke bukai.
“Udah nya bisi sekeda pekara ke patut diputar iya nya kesatu kitai patut nyendiaka teknologi,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya maya Nutup Kus enggau Nyuaka Setipikit Nyulam Baju Dabong diatur ba Diwan Komuniti Spaoh, pagi tadi.
Beduduk ari nya, ku Uggah siti palan bejait ngundan komputer deka dibuka ba Bukit Saban udah tu dikena ngemuntangka bala pemekuh industri ngaga baju Dabong ngasilka produk sida udah tu ila.
Sebedau nya, Uggah bisi nyuaka setipikit ngagai 20 iku penyereta ngaul raban indu ba sitak DUN Bukit Saban.
Sama bisi datai Sekretari Politik Roselind Mapong Sabai, Pegawai Nguasa Pelilih MitSpaoh, Denny Lim enggau ke bukai.-TVS