KUCHING, 23 Julai: Perintah Sarawak nadai niat deka ngelabuhka sebarang entiti nasional baka ke suah disebut sekeda raban.
Premier Sarawak, Datuk Patinggi Tan Sri Abang Johari Tun Openg madah, spekulasi nya nyadi ketegal ulah enda manah sereta betuju politik.
“Aku ngarapka raban nya enda bepolitikka juluk rayat Sarawak ti bela sama ngambi bagi dalam industri minyak enggau gas di menua tu. Kuasa enggau penatai pemisi menua tu patut dikunsi enggau lebih adil sereta sebaka,” ku iya.
Iya madah munyi nya lebuh bejaku ba Pengerami Ngintu Hari Sarawak 2024 ba Padang Bilun Lama Bintulu, malam tadi.
Pengerami tu mega bisi digulu Tuai Pemegai Menua Sarawak, Tun Pehin Sri Dr Wan Junaidi Tuanku Jaafar enggau bini iya, Toh Puan Fauziah Mohd Sanusi, Sapit Menteri Besai, Datuk Seri Fadillah Yusof enggau bini Premier, Puan Sri Datuk Amar Juma’ani Tun Tuanku Bujang.
Tandu Abang Johari, pemansang Sarawak enda ulih dijapai kediri enti nadai kerejasama semua raban.
“Chara ti pemadu pintar digaga Sarawak iya nya nengah atur kunsi enggau kerejasama enggau entiti-entiti nasional sereta entiti-entiti entarabansa dikena ngubah ekonomi di wilayah tu,” ku iya. – TVS