DEBAK, 20 Julai: Kaban Kunsil Nengeri (ADUN) Saribas Datuk Mohd Razi Sitam madah pemujur pemujur Perintah Sarawak Nyain Sempekat Pemereti Ati (MoU) enggau Kaunsil Turu Soldadu (LTAT) endang siti pengawa ke manah dikena negapka agi saham dalam sektor bank.
Ku iya, pemujur nya mega nyadi pengawa pemadu manah dalam juluk perintah nengeri beranakka puku dalam bemacham bidang.
“Aku andal nya endang siti pengawa ke pemadu manah digaga perintah nengeri dibaruh iring Premier.
“Pia mega tu senutuk enggau juluk kitai deka ngangkatka ekonomi Sarawak dalam bemacham bidang lebih agi ba pengawa beranakka puku enggau mega ba bidang bank,” ku iya maya dirandau TVS pengudah ngulu sebengkah pengawa ke diatur ba Kampung Serabang, Debak kemari.
Razi madah diri chukup ngarapka kerejasama nya deka bejalai enggau lanchar.
Sebedau tu siti MoU antara Perintah Sarawak enggau LTAT udah disain di Kuala Lumpur.
MoU nya mega ngaul pengawa ngulihka saham dalam Affin bank ari LTAT betuju dikena nyerungkai penau kerejasama enggau atur bekunsi penerang antara kededua raban.-TVS