KUALA LUMPUR, 17 Julai: Menteri Besai, Datuk Seri Anwar Ibrahim minta Opis Menteri Sains, Teknologi enggau Inovasyen (MOSTI) ngerintaika 100 iku saintis bioteknologi ngambika begempung ngatur program dikena nerenak pengerindu nembiak dalam bidang Sains, Matematik, Injinir enggau Teknologi (STEM) ba 100 buah sekula (dipilih).
Berindik ari nya, iya deka ripot pasal program nya dianjung ngagai iya dalam timpuh dua minggu.
“Nyadi anang ngambi mudah pekara tu laban kitai bulih penerang sekula sekondari lebih agi di luar mengeri enggau menua pesisir jauh tinggal.
“Enti ulih baka bisi 100 iku saintis enggau biotech ari ejensi, ari opis menteri, ari serikat-serikat sebulan sekali dua bulan sekali, dua jam tiga jam ba sekula sekondari enggau meri mimit pengeludas.
“Kita semua ulih mikir pasal empas,” ku iya.
Iya mansutka jaku nya rambau bejadika Program Jelajah Bioekonomi Kebangsaan bepalan ba di Palan Dagang Dunya Kuala Lumpur (WTCKL) ditu, sehari tu tadi.
Nangkan ke nya, Anuar mega nemu senentang pengerindu nembiak ba bidang STEM ti majak kurang nyentuk ke meri empas ngagai penyuntuk bakat dalam sekeda profesion baka injinir enggau mayuh agi.
Nengah pengawa ngatur Program Jelajah Bioekonomi Kebangsaan, Menteri Besai mega deka raban ke bekaul ngelangkar chara baru lebih agi baka ni chara meransang enggau negapka bidang nya ti agi bedau ngerembai ba runding rayat.-TVS