PUTRAJAYA, 13 Julai: Tuai Direktor Opis Pengerai Menua, Datuk Dr Muhammad Radzi Abu Hassan madahka, rikod kes tabin denggi di Malaysia majak nambah nya 2,805 dibanding 2,788 kes ba minggu sebedau nya.
kelimpah ari nya, bisi 65 kes pemati dirikodka ketegal komplikasi tabin denggi dibanding 42 kes pemati bagi timpuh ke sama ba taun 2023.
Nengah siti penerang, iya madah, penyampau nya nyadika kumulatif kes tabin denggi ba minggu epidimiologi ke-27 iya nya penyampau 78, 068 kes dibanding 61,000, 545 kes bagi timpuh ke sama taun nyin kemari.
“Bisi 65 kes pemati ketegal komplikasi tabin denggi udah diripotka dibanding 42 kes pemati bagi timpuh ke sama ba taun 2023,”ku iya.
Iya nambah, penyampau lokaliti tumpuk angat ti diripotka iya nya 86 lokaliti iya nya ngaul 67 lokaliti di Selangor, Nengeri Sembilan (6), Kedah (5), Perak (3), Pulau Pinang (2), Wilayah Persekutuan Kuala Lumpur (2) enggau Sarawak (1).
Iya madah, bagi kes survelan Chikungunya, bisi enam kes dirikodka ba minggu ke-27 enggau nadai kes Chikungunya ba minggu tu.
Ku iya, penyampau kumulatif kes chikungunya nyentuk ke diatu iya nya 47 kes.
Bagi survelan Zika , iya madah bisi 1,388 sampel darah, tujuh sampel urin enggau tiga sampel ai tulang belakang udah diperesa Zika enggau asil kesemua iya nya negatif.
Dr Muhammad Radzi madahka, KKM meransang komuniti terus bejalaika aktiviti ‘Ngiga enggau Munas’ tansang Aedes sechara konsisten ba kandang rumah diri empu abis nadai 10 minit dalam seminggu.-TVS