SARATOK, 11 Julai: Aktiviti eko dagang temuai rampa menua di sitak Kunsil Nengeri (DUN) Krian deka terus ditegapka udah tu ila.
Kaban Kunsil Nengeri (ADUN) Krian Friday Belik madahka, aktiviti nya dikena nentuka sitak Krian terus mengkang nyadi siti ari destinasyen eko dagang temuai besai ti bepelasarka rampa menua ke efektif enggau tebilang dudi hari ila.
“Kami ngembuan perambu timpuh panjai enggau timpuh pandak dikena nyadika eko dagang temuai siti ari program ba sitak Krian, kami deka negapka perayat lokal ngambika ulih ngambi bagi dalam program nya,”ku iya.
Iya bejaku munyi nya ngagai TVS pengudah tembu Pengawa Nasih Tanah Taba Rumah Panjai Baru Sungai Entangor di Batu Burak, ditu kemari.
Ku iya, aktiviti enggau inisiatif nya dipejalaika bepelasarka pemujur atur pengawa Krian Fest Nature Challenge (KFNC) 2024 bedau lama tu tadi, ke udah mujur matak penatai mensia mayuh nyengkaum temuai ari menua luar.
Tandu iya, raban iya mega diatu dalam proses deka ngelala rumah panjai di Krian ti ngembuan juluk deka ngambi bagi dalam program ‘homestay’.-TVS