SARATOK, 1 Julai: Objektif ngatur ‘Krian Fest Nature Challenge’ (KFNC) 2024 dikena ngelakuka rampa menua enggau negapka ekonomi komuniti menua pesisir nengah aktiviti lumba ungkup edisyen serak tu tejapai.
Kaban Kunsil Nengeri (ADUN) Krian Friday Belik madahka, juluk nya nyata tejapai berindik ari sambut ti chukup manah ari temuai luar enggau dalam Saratok sepanjai timpuh dua hari program nya diatur.
“Objektif kitai ngatur program berakit enggau ensikal bukit serak tu iya nya dikena kitai ngayanka pemanah rampa menua kitai (Saratok).
“Agi tubah dipeda tulin sereta ngemegah kelimpah dikena kitai matak penatai temuai ari menua-menua bukai awak sama-sama berami seraya meda pengidup rayat kitai ba rumah panjai.
“Baka dua malam tiga hari tu aku meda kaul kitai enggau pangan diri chukup manah, nadai ninga sebarang ripot ti enda ngelantang ati,” ku iya.
Iya mansutka jaku nya rambau Pengerami Krian Fest Nature Challenge Edisyen 2024 ba pelaman Rumah Panjai Jaga Eddi Tembawai Emperan Nanga Grenjang, kemari.
Iya nerang, pengawa ngatur KFNC nya mega betuju dikena meri awak enggau peluang ngagai komuniti rumah panjai bejalaika aktiviti dagang mit.
Kelimpah ari nya, ku Friday, peneleba ti diulih nya beguna dikena neruska aktiviti dagang ngagai tikas ke lebih tinggi.
Bisi 2, 000 penatai temuai dirikodka sepanjai timpuh tiga hari dua malam sepanjai pengerami KFNC 2024 ti berengkah ari 28 June lalu tembu kemari (Hari Minggu).
Sama bisi datai, Pegawai Pelilih Saratok Mohd Dino Amid ke mega Chairman KFNC 2024 enggau Pegawai Nguasa (SAO) Pelilih Mit Nanga Budu Hatta Adenan.-TVS