KUCHING, 28 June: Penyampau semua tanah di Sarawak bisi 12.4 juta hektar lalu ari penyampau nya lebih 60 peratus agi meruan dibalut kampung.
Sapit Premier Sarawak, Datuk Amar Awang Tengah Ali Hasan madah, nengah polisi nguna tanah ke terang dikembuan Sarawak, Opis Kampung Sarawak (JHS) ulih bejalaika tanggungpengawa enggau lebih manah sereta bisi empas.
“Kitai nyentuk ke diatu ulih ngetanka bungkur kampung di nengeri tu ari 12.4 juta hektar penyampau tanah ke alai kitai bisi lebih 60 peratus agi dibungkur kampung.
“Kitai ngembuan pelasar nguna tanah ke chukup terang ke alai kitai ulih bejalaika tanggungpengawa senutuk enggau pengawa nguna tanah tu,” ku iya .
Awang Tengah madah munyi nya rambau Pengerami Anugerah Servis Nyulut enggau Meri Pengaga Ati Ngagai Orang Ti Udah Pinchin Opis Kampung Sarawak 2023 ditu, malam tadi.
Nangkan ke nya, Awang Tengah madah iya deka meda pemujur pengawa nya nengah pemisi 26 unit pengatur kampung enggau tujuh unit pengatur ladang kampung ke udah diberi setipikit ngaul pemesai 2.38 juta hektar tanah.
Pengawa nya mandangka pengulis opis kampung enggau pengatur kampung bejalaika pengawa enggau lebih meruan, ku iya.
Ku iya tandu madah, pengawa nguna teknologi dalam ngatur kampung Sarawak mesti ditambah ngambika tu ulih dipejalaika enggau lebih jampat, efisien sereta nambahka integriti dalam ngatur puncha kampung.
Ku iya madah agi, kerejasama aktif opis kampung enggau opis ke bukai dalam bejalaika tanggungpengawa nguna chara kreatif enggau inovatif beguna dalam ngintu kampung-kampung di Sarawak.-TVS