KOTA SAMARAHAN, 22 June: Kaban Parti Keadilan Rakyat (PKR) di nengeri tu ditangkan terus sejalai enggau kuing tuju tauka penemu PKR Pusat lebih agi bekaul enggau isu Pengawa Bepilih Besai Nengeri (PRN) Ke-13.
Mandal Presiden Parti Pesaka Bumiputera Bersatu (PBB) Dato Sri Abdul Karim Rahman Hamzah madah, penerang dipansutka Sekretari Pemadah PKR Sarawak Iswardy Morni apin lama ke udah nyau baka ngelaban arus taja pan kebendar GPS enggau PKR bela bekerejasama numbuhka Perintah Penyerakup.
Abdul Karim madah, penerang dipansutka Iswardy Morni ti ngumbai PKR Nengeri sedia belaban enggau GPS ba PRN-13 bisi besibil mimit enggau kerejasama ke digaga antara parti nya dibaruh Perintah Penyerakup.
“Suba aku nganti iya belaban enggau aku ba Asajaya. Iya enda nyadi bediri minta pilih.
“Enti iya deka bediri, bai orang baru enti bediri. Enti udah gidan amat deka bediri, uji mih bediri, Sarawak (kitai) seruran nganti.
“Tang aku andal tuai pemadu tinggi PKR iya ke dipebasa Menteri Besai, iya nadai ngembuan ulah baka Iswardy Morni,” ku iya.
Sebedau tu, Iswardy bisi mansutka jaku madahka PKR Sarawak sedia nyatup GPS ba PRN ke-13 deka datai nyema bisi gerah ari PKR Pusat ungkup pengawa nya.
Ku iya, taja GPS begulai numbuhka Perintah Penyerakup ba renggat Perintah Besai tang kerejasama nya semina dalam gempung perintah ukai gempung kerejasama antara parti.
Ku tandu iya, kebuah pia laban GPS ukai sebagi ari gempung dalam Pakatan Harapan (PH) ke bela diarika Parti Tindakan Demokratik (DAP).-TVS