SIBU, 17 June: Siku lelaki peranak menua luar ditan nyengkaum 710.05 gram dadah bemacham leman nengah sebengkah pengawa ngerap dipejalaika Unit Pansik Jenayah Narkotik Indu Opis Polis Pelilih (IPD) Sibu ngagai sebuah palan pemerindang di Jalai Pahlawan di Sibu, malam Hari Enam.
Tuai Polis Pelilih Sibu, Asisten Komisioner (ACP) Zulkipli Suhaili madah, pengawa ngerap nya dipejalaika urung pukul 10.20 malam lalu raban Narkotik tetemuka 18 piket plastik burak betulis ‘Juice Master’ ngundan champur dadah ekstasi kira 692.90 gram pemerat.
“Asil pengawa ngerap enggau meresa dipejalaika raban Narkotik udah ngetan siku lelaki peranak Indonsia beumur 26 tan ba sebengkah palan pemerindang nya.
“Bela ditemu 8 piket plastik burak ngundan batu kristal berat 9.18 gram dipelaba ketamin enggau 14 igi pil ekstasi berat 8.07 gram,” ku iya.
Ku terang iya, asil peresa ai kemi ngagai saspek nya dipeda negatif lalu nadai ngembuan sebarang rikod lama bekaul enggau dadah.
“Saspek udah nya ditangkap nengah Seksyen 39B Akta Dadah Berbahaya (ADB) 1952 enggau polis udah ngerah perintah riman pengelama 7 hari dikena mantu pansik,”ku tandu iya.
Zulkipli madah, ukum ungkup penyalah dibaruh Seksyen 39B ADB 1952 nyema dikenuku salah ulih kena tinggang ukum gantung sampai mati.-TVS