ENGKILILI, 23 Mei: Rayat mayuh, bala tuai parti komponen Gabungan Parti Sarawak (GPS) sereta bala tuai opis enggu ejensi perintah ba sitak Kunsil Nengeri (DUN) Engkilili ditesau bela Segulai Sejalai beserakup ngambika rayat ba sitak terus ngasaika pemansang baka ba menua bukai.
Kaban Kunsil Nengeri (ADUN) Engkilili Dr Johnical Rayong Ngipa madah, laban ke nyadi pengari rayat iya deka semua rayat di Engkilili enda ngira bansa enggau pengarap terus seati ke pemaik semua.
“Aku laban ke nyadi pengari rayat di Engkilili ditu deka mai kitai Segulai Sejalai.
“Deka meda semua rayat di DUN N.33 Engkilili idup bebaik enda ngira bansa enggau pengarap dalam perintah GPS semua kitai terus mansang ke mua meda timpai ke jauh bepelasarka konsep cherita baru ungkup pengelantang Sarawak sereta rayat,” ku iya.
Dr Johnical mansutka jaku nya maya Pengerami Mantar Gawai Dayak 2024 diatur ba Rumah Jack Braoh, Pais Skrang ditu kemari.
Ku tandu iya, peranak di Engkilili mega patut ngiarka bida penemu enggau jalai politik ke dititih lalu terus meri sukung ngagai perintah GPS dibaruh iring Premeir Sarawak Datuk Patinggi Tan Sri Abang Johari Tun Openg.
Iya madah diri sigi enda bechiping dalam magi projek tauka agih belanja dibaruh Projek Transformasyen Menua Pesisir (RTP), Projek Mit Pemansang Menua Pesisir (MRP) enggau agih dibaruh Projek Ngemanah Rumah Miskin Sarawak (PPRMS) ke ngembuan penyampau manggai RM8 juta di DUN Engkilili.-TVS