BETONG, 13 April: Agih belanja tambah sepenyampau RM5 juta udah dikemendar dikena ngemanah Jalai Ulu Rimbas ke ngembuan 13 kilometer pemanjai di Debak.
Sapit Premier Sarawak Datuk Amar Douglas Uggah Embas madah, agih belanja nya diberi dikena nambahka agih belanja sebedau tu sepenyampau RM20 juta laban ti enda chukup.
“Ungkup kitai di Rimbas ditu kami udah ngemendarka RM20 juta dikena ngemanahka Jalai Ulu Rimbas ditu.
“Aku udah berandau enggau Dr Cassidy (JKR) ngiga jalai ngatur utai nya jampat agi nyadi iya madah apin chukup belanja nya.
“Ari nya tadi, aku enggau MP (Betong) setuju nambahka RM5 juta dikena nembuka projek jalai nya,” ku iya.
Uggah ke mega Kaban Kunsil Nengeri Bukit Saban madah munyi nya maya bejadika Rumah Panjai Baru Nanga Pek di Debak, Hari Lima.
Iya madah diri udah minta raban Opis Kereja Raya (JKR) Bagi Menua Betong lengkas ngaduka Jalai Ulu Rimbas seraya nganti pengawa ngemanah nya berengkah.
Penembu projek jalai nya jemah deka meri pemaik ngagai 13 buah rumah panjai ke sama kunsi betengahka jalai nya.
Projek ngemanah Jalai Ulu Rimbas nitihka R3 lalu dipelaba deka ditinda ba suku ketiga taun tu.-TVS