BETONG, 16 Sept: Penyikar dua iku pengani Rumah Panjai Stephen Lambor Jerai di Debak udah mujur nagang rumah panjai sida ari kena tuntung penusah angus urung pukul 10.18 minit malam tadi.
Tuai Balai Bomba enggau Penyah Penusah Betong, Penulung Penguasa Bomba Vincen Baling Yabi madah, pemerani Johny Entering Ango enggau Berang Gira mandangka pengasi Program Licha Angus ke kala diatur ba sekeda rumah panjai di Betong ngelama tu.
“Sida udah mujur ngerara api nya tumu ngena kerebak pengerara api, nyadi tu mih dikumbai ‘bujang berani’ bomba laban udah mantu nyelamatka reta tengkira ba penusah ke nyadi malam tadi.
“Ari pemujur tu deka nyadi rikod laban sebedau tu raban bomba kala ngatur licha pengelikun angus enggau mega demontrasyen ngerara api ngena kereban pengerara api bekau ari tu siti pemujur ke chukup manha laban sida nitih teori (penemu) enggau mega schara pratikal maya mutarka penusah angus,” ku iya.
Iya mansut timbal nya bekau ari insiden angus ke nyadi ba Rumah Panjai Stephen Lambor di Debak malam tadi.
Ku iya, raban bomba udah tu deka terus bekerejasama enggau sebarang raban ngemujurka program tauka licha pengelikun angus ba rumah panjai tauka genturun pendiau di Betong.
Dulu ari nya bisi enam kaban BBP Betong berumban ngesah palan penusah pengudah nerima kangau tasah pukul 10.18 minit malam.
Penusah nya ngaul sebuah pangking sadau bilik lumur 46 ke diuan dua iku orang ke beumur 58 enggau 59 taun udah angus 40 peratus.
Taja pia nadia penusah bebadi nyawa bekau ari penusah nya lalu operasyen ngesah nya tembu pukul 11.48 minit malam.
Sama bisi datai ngesah iya nya tujuh iku kaban Tim Bomba Volunteer (PBS) Debak enggau Raban Penyaga Pengelikun Mensia Mayuh (APM) enggau Polis Diraja Malaysia (PDRM).-TVS
