DARO, 15 Sept: Penanggul bekal ai ke udah lama ditapi rayat di pulau bruit dipelaba deka teputar penuh pengudah projek sistem bekal ai Pulau Bruit tembu ujung taun tu.
Premier Sarawak Datuk Patinggi Tan Sri Abang Johari Tun Openg madah, enti udah tembu ila, nya deka nyendiaka bekal lebih 5 juta liter ai sehari (JLH) ngagai rayat di sitak nya.
“Arapka ujung taun tu bekal ai sepenyampau 5 (JLH) ulih dibekalka ngagai rayat di Pulau Bruit,” ku iya.
Iya madah munyi nya maya bejaku ba Pengerami Bejadika Pesta Pulau Bruit 2024 di RGC Semop kemari.
Ku iya, Perintah Sarawak ngambi inisiatif melanja ungkus semua projek nya dikena nentuka isu bekal ai nya teputar ungkup timpuh panjai.
“Projek ke beungkus lebih RM60 juta nya betuju meri pengelantang ngagai rayat lokal kelimpah dikena nangkup peminta guna rayat ke majak nambah,” ku terang iya.
Sebedau tu, sitak utara Pulau Bruit nyengkaum Kampung Penipah, Kampung Tekajung enggau Kampung Bruit suah napi penanggul bekal ai ketegal suntuk ai beresi. -TVS
