SRI AMAN, 15 Sept: Perintah Gabungan Parti Sarawak (GPS) komited deka ngangkatka pemansang di serata wilayah tu, ti diasaika ulih nentuka penegap ba renggat Perintah Besai.
Premier Sarawak, Datuk Patinggi Tan Sri Abang Johari Tun Openg ke mega Chairman GPS madahka, komitmen nya dikemujur bepelasar ngagai semangat Sempekat Malaysia 1963 (MA63) dikena nentuka hak Sarawak dalam konstitusyen Perintah Malaysia seruran dijaga.
“Baka ti ditemu bala mayuh, kitai (Sarawak) udah bulih mayuh asil penatai pemisi ti disungkak ari puncha minyak enggau gis pengudah atur bejalaika Chukai Jual Nengeri (SST) ba taun 2019.
“Penatai pemisi Sarawak udah niki urung RM13 bilion dibanding semina RM4 nyentuk RM6 bilion dalam timpuh 10 taun ke udah,” ku iya.
Iya mansutka jaku nya nengah teks jaku iya ti dibacha sapit Premier Sarawak, Datuk Amar Dr Sim Kui Hian rambau bejadika Pengerami Makai Selamat Pengarap Bukai Nyerumba Pengerami Hari Malaysia Renggat Sarawak di Sri Aman kemari.
Asil penatai pemisi tambah ari SST enggau penyungkak ekonomi bukai mantu perintah sarawak ulih bejalaika mayuh agi projek ti meri pemaik ngagai rayat.
Tu nyengkaum baka bantu ngagai rumah sembiang bukai baka gerija ungkup pengarap Kristian enggau kuil ungkup Budha, Taoisme, agama Bahai, Sikh enggau Hindu.
“Nengah aum ke manah entara Sarawak enggau perintah besai pasal Sempekat Malaysia 1963 (MA63) , kitai ulih ngemansang Sarawak nyau deka pemesai Semenanjung Malaysia.
“Nya alai, kami ngarap iring tuai ba renggat konsititusyen perintah besai ulih adil laban semua tu bepelasarka hak undang-undang ti udah ba dalam Sempekat Malaysia enggau (MA63),” ku iya. -TVS
