SPAOH, 15 Sept: Pengawa ngatur Program Kembara Merdeka Jalur Gemilang (KMJG) nyerumba bulan kebangsaan iya nya pantar ti pemadu manah dikena narak semangat patriotisme ba rayat menua pesisir.
Kaban Parlimen Betong, Dr Richard Rapu madahka, pengawa ngatur program baka nya mantu komuniti lokal ngulihka akses pemadu baru sereta penerang ke betul bekaul perintah.
“Kembara Merdeka Jalur Gemilang baka ti dipadahka direktor tadi endang engkeman diatur maya bulan kebangsaan.
“Tuju iya dikena narak semangat patriotisme enggau meri semua penerang pasal polisi perintah ngagai rayat lebih agi rayat di menua pesisir.
“Ari aktiviti enggau media rama program baka tu manah dikena ngenataika info sereta penerang pemadu baru pasal polisi perintah,” ku iya.
Iya mansutka jaku nya rambau Program Kembara Merdeka Jalur Gemilang 2024 ditu, kemari.
Ku iya madah agi, program nya deka ngemudahka enggau mantu komuniti rayat di menua pesisir nentuka semua penerang pelesu tauka enda betul bekaul enggau perintah ti disadung sekalika ba media rama enggau ke bukai.
Udah nya, ku iya, komuniti menua pesisir patut pintar dalam nguna teknologi ngambika nya tau meri pemaik ngagai pengidup sida ninting hari.-TVS