BETONG, 15 Sept: Komiti Kaunsil Perunding Perintah deka berandau pasal pemutus Kaban Parlimen Penyakal Nulak draf Memorandum Sepekat Pemereti Atu (MoU) ke udah dibantai ngagai sida sebedau tu.
Taja pia ku Sapit Menteri Besai, Dato Sri Fadillah Yusof Komiti Kaunsil Perunding Perintah ti betuaika iya agi bedau nerima sebarang surat rasmi ari kaban parlimen nya bekaul enggau pekara nya.
Ku Fadillah, iya semina nemu pasal pekara nya nengah media tang iya tetap bebasaka penemu kaban parlimen penyakal nya.
“Aku nganti surat rasmi ari sida…lalu enti udah bisi ila aku deka mai nya ngagai renggat Komiti Kaunsil Perunding Perintah Penyerakup.
“Ari nya kitai deka berandau baruh mih.
“Nama pekara sekali kitai deka neruska randau tauka sekalika tu pengujung iya ari raban penyakal.
“Sida berandau nya aku enda nemu, laban nama ke udah dipadah sida enda setuju enggau semua lebas nya, aku enda nemu mih penemu sida sekalika deka terus berandau tauka enda ibuh,” ku iya.
Iya madah munyi nya pengudah bejadika Pengawa Nangguhka Regata Tandang Sari 2024 ditu, pagi tadi.
Fadillah madah, iya ngarapka bala kaban parlimen nya deka datai baru madah nama pekara ke enda disetuju sereta buah runding pasal pekara ke enda disetuju nya.
Ku iya, sebarang pemutus Komiti Kaunsil Perunding Perintah Penyerakup deka digaga udah tu ila sepengudah beratika draf rasmi kebuah iya ditulak PN diserah ngagai komiti sida.
PN sehari tu ngenukuka sida selubang penemu nulak dua draf perambu MoU ari perintah bekaul enggau agih belanja ungkup Kaban Parlimen PN.
Tuai Penyakal, Datuk Seri Hamzah Zainudin, madah, pemutus nulak dua draf perambu MoU ke ngaul antara perintah enggau parti PN sereta antara perintah enggau semua Kaban Parlimen PN nya digaha beduduk ari empat kebuah fundamental.
Iya madah, langgur MoU nya betingkah enggau Konstitusyen Perintah Besai sereta pendiau budaya, moral sereta pengarap, kelimpah ulih ngasuh salah peragam sereta nagang pengelebas.-TVS
