SPAOH, 15 Sept: Betong diatu dipeda antara siti ari bagi menua ti pemadu mansang di Sarawak, ku Datuk Amar Douglas Uggah Embas.
Sapit Premier Sarawak nya madahka, tu beduduk ari  nyau deka semua kandang endur di bagi menua Betong udah disikap enggau perengkaguna pemun baka jalai alun, bekal ai beresi enggau bekal karan 24 jam.
“Lebuh kitai meda baka ke sehari tu,  Betong nyadi siti ari bagi menua ti pemadu mansang di Sarawak ari sukut pemansang bungkur jalai alun nyapai 95 peratus bungkur bekal ai enggau ngelui ari 90 peratus udah bisi bekal karan.
“Kitai mega bisi sekeda buah sekula lalu aku berunding semua kandang endur nyapai abis nadai 90 peratus kandang endur kitai di bagi menua Betong ulih dilawa nengah jalai alun tang sigi andal manggai taun 2030 ila semua ulih besambung enggau jalai alun di bagi menua Betong,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya maya bejaku ba Pengerami Kembara Merdeka Jalur Gemilang (KMJG) 2024 Renggat Pelilih Betong, ditu kemari.
Ku iya nambah, tikas sosioekonomi rayat di Spaoh mega  udah jauh mansang ti dibandingka sebedau tu.
Kelimpah ari nya, ku iya madah Betong mega mandangka kelai penyerakup ti rat di wilayah nya berindik ari komuniti ke semampai bebasaka pangan diri sereta nadai sebarang penanggul ti ngaul  ari sukut pengarap enggau ke bukai.-TVS
