SARATOK, 12 Sept: Penusah angus ke nuntung Rumah Panjai Spencer Biju di Lubok Sengelang Sebetan Roban udah neri perati ari Gerup Serikat Malaysia LNG (MLNG) Bintulu.
Kaban Kunsil Nengeri (ADUN) Krian Friday Belik madah, bantu ke diberi serikat MLNG Bintulu ngagai sida ke tasah angus siti bukti nyata serikat korporat mega enda tingal bejalaika tanggungpengawa rama korporat (CSR) sida ungkup orang tusah.
“Ngarika semua sida ke tasah angus ba Rumah Spencer Biju, aku deka meri besai terima kasih ngagai raban MLNG Petronas Bintulu lebih agi Tuai Pegawai Eksekutif (CEO) Encik Laga Jenggi laban udah mandangka penyiru mantu ngelempungka tating penusah sida ke tasah.
“Tu endang pengawa ke chukup badas dikereja raban opis korporat dalam mantu raban orang ke dituntung penusah baka peranak Rumah Spencer Biju,” ku iya.
Iya madah munyi nya maya ngulu Program Ngangkatka Tikas Pengidup Mantu Penusah Ngenyit 2024 nengah Gerup Serikat Malaysia LNG (MLNG) ditu, kemari.
Ku terang iya, pengawa mamdangka rambai jaku ‘berat sama ngesan, lempung sama nanggung’ agi meruan dipegai rayat Sarawak enda ngira bansa, jalai pengarap enggau penemu politik.
Nangkan ke nya, Tuai Rumah (Tr) Spencer Biju maya dirandau TVS meri besai terima kasih ngagai genap bantu ke udah dianjung sekalika nengah orang siku-siku, gerempung ukai perintah (NGO) enggau serikat-serikta koporat kenyau hari keterubah sida dituntung penusah nya.
“Meri besai terima kasih besai ngagai bala NGO enggau bala orang siku-siku enggau staf perintah enggau mega bala Petronas iyaka udah ulih mantu kami ari segi wang ringgit, barang makai, barang elektrik enggau barang ke bukai.
“Terima kasih ngagai semua kita ke udah mantu kami enda ulih diselintingka aku opis tauka nama siku-siku,” ku iya.
Program nya ku endang siti program tanggungpengawa rama korporat (CSR) anak serikat Petronas, gerup serikat Malaysia LNG bepengkalan di Bintulu.
Ba pengerami ke sama bisi diatur kelai nyuaka bantu ari Opis Pengintu Pengelantang Raban Bansa Sarawak (JKMS) sepenyampau RM 176, 700.
Udah nya, penyampau bantu mata duit ari orang siku-siku sereta NGO naka tu udah manggai RM113,024.
Rumah spencer Biju di Lubok Sengelang Sebetan Roban bisi 26 pintu bilik angus lengis ba penusah ke nyadi kena 21 Ogos tu tadi.
Sama bisi datai ADUN Kalaka Mohd Duri, Menijar Opis Pekara Mensia Mayuh enggau Administrasyen Gerup Serikat MLNG Araffie Igat enggau ke bukai.-TVS
