SARATOK, 12 Sept: Pesta tengan musin larah tauka Pesta Kuih Bulan ti diintu ba hari ke-15 dalam bulan Ogos nitihka kalinda China, tauka 17 September taun tu, dipeda nyadi siti kelai penyerakup entara pupu raban bansa di Sarawak, lebih agi ba Saratok.
Kaban Kunsil Nengeri (ADUN) Krian, Friday Belik madahka, pengerami ti diintu komuniti Tiong Hua nya udah mujur nyerakupka rayat, ke enda ngira ideologi, bansa sereta jalai pengarap.
“Ukai semina entara ruang bilik tang ulih dikerembaika ngagai komuniti kitai (bukai), tebal agi rayat pupu bansa, ti mandangka kitai ulih idup begulai dalam siti ruang bilik enggau siti komuniti ti beserakup.
“Kitai nadai ngira kulit, jalai pengarap, bansa sereta budaya kitai tang kitai ulih idup manah enggau pangan diri.
“Kita mega nadai ibuhka bida entara kitai dikena mechahka kitai enggau pangan diri, nyadi nya mih reti kebendar Pengerami Kuih Bulan,”ku iya.
Iya bejaku munyi nya rambau bejadika Pengerami Kuih Bulan SJKC Myn Syn 2024 diatur Gerempung Alumni SJKC Myn Syn Saratok ditu, kemari.
Tandu iya pengerami nya diatu ukai semina diintu komuniti Tiong Hua aja, tang mega diintu begulai enggau komuniti bukai baka bansa Melayu, Iban enggau ke bukai.
Iya madahka, semangat ngintu Pengerami Kuih Bulan patut dijadika siti teladan ngagai komuniti pupu bansa di Malaysia.
Pengerami nya digulu urung 800 iku temuai nyengkaum alumni SJKC Myn Syn, raban apai indai enggau nembiak sekula SJKC Myn Syn enggau ADUN Kalaka, Mohd Duri.-TVS
