KUCHING, 12 Sept: Dua unit keterubah pengangkut Transit Arus Automatik (ART) ngena kuasa hidrogen ungkup projek sistem pengangkut mengeri Kuching KUTS deka dianjung ke mengeri Kuching ujung taun tu.
Menteri Pengangkut Sarawak Dato Sri Lee Kim Shin madahka, pansik prakomisyen enggau peresa fizikal sereta diuji deriba ngaul unit keterubah ART nya dipejalaika hari satu tu tadi ba fasiliti pemansut CRRC Corporation Limited (CRRC) di Yibin, wilayah Sichuan China.
Ba penerang nya, iya tepantup ati meda pemujur projek kuts enggau pemansang projek ngaga pengangkut nya.
Ari 38 unit ART ke diudar nya deka datai sechara berenggat di Kuching berengkah taun tu.
Lima unit deka dianjung pengudah tembu penuh lalu laluh ke bukai deka dianjung nyadi unit setengah tembu dalam timpuh beberapa taun ke deka datai.
“Projek ART udah nerima perati ukai semina ari sekeda nengeri bukai di Malaysia, tang mega menua pengimbai di serantau ke bukai, tebal agi pemujur Sarawak mandangka pengangkut ART hidrogen lebuh Prove of Concept (POC) taun siti nyin suba enggau peresa injinir.
“Aku pechaya serata dunya benung meri perati ngagai pekara ke dipejalaika Sarawak dalam transformasyen sistem pengangkut mensia mayuh, tebal agi dalam nguna kuasa beresi ke alai dalam pekara tu ngaul hidrogen gadung,” ku iya.
Enti dibanding enggau prototaip pengangkut ART ke diguna dalam latih POC, iya madahka model baru nya ngempung sekeda penteba ti dikemanahka nyengkaum ulih niki selipir tanah.
Nyentuk ke 10 peratus enggau ulih dikena dalam mayuh bengkah gaya jalai, enggau pengelaju maksimum 80 kilometer sejam.
ART hidrogen tu ngena turai tukuh ke lebih lempung, ngurangka berat penyampau 2.5 tan, nyadika lebih sikar kuasa.
Ungkup ngemudahka penguna, iya madahka ART hidrogen tu deka disikap enggau endur khas alai ngengkah bagasi, kerusi roda enggau ensikal lipat.-TVS
