KOTA KINABALU, 12 Sept: Kaunsil Pengatur Pejalai Sempekat Malaysia 1963 (MTPMA63) sehari tu tadi udah mutuska pengawa meri agih belanja khas ngagai Sabah enggau Sarawak ba baruh Pekara 112D ditikika sekali lipat.
Sapit Menteri Besai, Datuk Seri Fadillah Yusof madahka penyampau agih khas nya ditambah ngagai RM600 juta enti dibanding RM300 juta sebedau tu, ke udah disetuju sechara interim.
Taja pia, formula ti diguna dikena nentuka penyampau meri agih belanja khas sechara tetap bedau diputuska.
“Bisi sekeda ti udah dikerandau kami tadi (Hari Empat), batang pekara ti dipadahka Menteri Besai bekaul enggau Pekara 112D, agih belanja khas ungkup Sabah enggau Sarawak.”
“Taun nyin kemari, kami madahka penyampau RM300 juta ungkup tetiap nengeri, enti nitihka tu, iya nya interim, pansik baru tetiap lima taun tadi udah diputuska dikena nikika taga tu ari RM300 juta ngagai RM600 juta,” ku iya.
Iya mansutka pekara nya rambau aum media Pengudah Aum MTPMA63 Tusn 1 2024 ba Palan Konvensyen Antarabansa Sabah (SICC) ti betuaika Menteri Besai Datuk Seri Anwar Ibrahim.
Sama bisi datai ngulu aum tu Premier Sarawak, Datuk Patinggi Tan Sri Abang Johari Tun Openg enggau Kepala Menteri Sabah, Datuk Seri Panglima Hajiji Noor.
Peniki agih belanja nya, tandu ia udah disetuju begulai dikena mantu Perintah Sabah enggau Sarawak.-TVS
