SARATOK, 12 Sept: Penusah ke ditapi pengani Rumah Panjai Spencer Biju di Lubok Sengelang Roban ti tebunsa nadai agi rumah ketegal penusah angus nuntung kena 21 Ogos tu tadi deka teputar.
Kaban kunsil nengeri (ADUN) Krian Friday Belik madahka, sida deka bisi rumah baru sereta dibantu ngentak rumah panjai nya nengah agih Projek Nyeruri Rumah Seranta Sarawak (PPRMS) ke nguna kos sepenyampau RM260, 000.
“Kami ari Palan Servis ADUN Krian udah mutuska, keterubah iya nya ungkup nyungkur taba rumah ke udah bisi dia.
“Pengawa tu udah berengkah dipejalaika dua hari ke udah lalu kami melabaka proses nya deka nguna timpuh abis nadai dua minggu.
“Udah nya, kami deka meri bantu nengah agih Program Nyeruri Rumah Seranta Sarawak (PPRMS), enggau ungkup tetiap pintu, kami deka meri bantu penyampau RM10, 000 dikena sida ngentak rumah baru,”ku iya.
Iya bejaku munyi nya rambau dirandau pemberita maya datai ngulu Program Ngangkatka Tikas Pengidup Mantu Penusah Ngenyit 2024 ari Gerup Serikat Malaysia LNG (MLNG) ba Diwan Komuniti Roban, kemari.
Friday nerangka, pengani Rumah Panjai Spencer Biju mega nerima bantu ungkup tuju ke sama ari Opis Pengintu Pengelantang Komuniti Sarawak (JKMS) enggau agih penyampau RM5, 000 sepintu.
Tandu iya, pengawa ngentak rumah panjai baru nya dijangka deka ngambi timpuh pengelama dua bulan ari diatu pengudah proses nyungkur taba tembu.-TVS
