MIRI, 8 Sept: Siku lelaki bebadi nyawa pengudah kerita ke ditepan iya kena lantak sebuah kerita pikap ba Jalai Pan Borneo ditu, kemari.
Tuai Polis Pelilih Miri, Penolong Pesuruhjaya Alexson Naga Chabu madah, ba penusah ke nyadi urung pukul 2.30 lemai, tudah ke beumur 68 taun deriba kerita Perodua Viva udah disahka mutus seput maya ba rantau jalai lebuh dianjung berubat ke sepital.
“Asil tasat polis tetemuka entukar Perodua Viva ti datai ari Bekenu nya ngubah jalai ke kanan.”
“Tu ngujungka sebuah kerita Toyota Hilux ke ditepan siku lelaki beumur 43 taun datai ari belakang enda sempat nyeliah ke iya lalu ngelantak belakang kerita nya,” ku iya nengah siti penerang sehari tu tadi.
Ku iya madah, berindik ari penusah nya, kerita Perodua Viva balat rusak ba belakang seraya kerita Toyota Hilux rusak ba luan.
“Lelaki ke deriba kerita Toyota Hilux diripotka nadai sebarang bakal,” ku iya.
Kes ditasat ari baruh Seksyen 41(1) Akta Pengangkutan Jalan 1987.-TVS