KUCHING, 8 Sept: Program Jelajah Saya Digital (JSD) ti diatur Kaunsil Ekonomi Digital Malaysia (MDEC) patut dikerembai ngagai sitak bukai di Sarawak dikena narak pemereti sentang guna teknologi digital enggau mutarka gaya idup pintar ba rayat.
Sapit Menteri Digital, Datuk Wilson Ugak Kumbong madahka, tu deka meri peluang sama bela ngagai rayat di mengeri enggau menua pesisir dikena ngangkatka penau pedagang dalam nguna teknologi digital enggau nambahka asil penatai pemisi.
“Aku minta MDEC tu neruska jelajah ngelingi kandang endur ngambika rayat di Bintulu, Kapit, Belaga ulih ngasaika enggau nemu kitai deka gawa enggau SDEC ngambika kitai begulai enggau nengeri Sarawak ngambika peranak genturung pendiau pan enda tinggal.
“Kitai deka terus meri sanding penemu enggau pemereti tu awak ke kaban pedagang mit kitai ulih nyungkak penatai pemisi ninting bulan enggau ke bukai,” ku iya.
Iya mansutka jaku nya rambau ngelancharka Program Jelajah Saya Digital Kuching di Plaza Merdeka, Kuching kemari.
Program JSD diatur pengelama dua hari berengkah ari tujuh ngagai 8 September 2024 di Plaza Merdeka enggau naga penatai temuai iya nya 2,500 iku.-TVS
