KUCHING, 8 Sept: Graduet Politeknik enggau Kolej Komuniti (POLYCC) Sarawak diatu udah nyingkang ke mua dalam nangkup peminta guna pengereja pengawa teknikal menua.
Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee In madahka, nyentuk ujung taun 2023, 40 peratus ari pengereja pengawa teknikal menua iya nya graduet POLYCC.
“Graduet POLYCC mega udah ngerikodka tikas penau gawa ngelui 90 peratus pengelama tiga taun bejurut. Tu ngayanka graduet politeknik seruran nyadi pilih enggau nangkup guna pengaji.
“Pikir skeptikal ngagai graduet POLYCC diatu belubah lenyau enggau mayuh apai indang meransang nembiak sida ngambi TVET nyadi pilih dikena nampung pelajar,” ku iya.
Iya mansutka jaku nya nengah teks jaku ti dibacha Sapit Menteri Pelajar, Inovasyen enggau Pemansang Bakat Sarawak, Datuk Francis Harden Hollis rambau Hari Kedua Pengerami Konvokesyen Politeknik enggau Kolej Komuniti Zon Sarawak 2024 ditu, pagi tadi.
Ku Roland nambah, statistik nya mega muai stigma komuniti pasal penau graduet POLYCC lebih agi dalam pelajar vokasional enggau teknikal TVET.
Bisi 422 iku graduet nerima diploma sereta setipikit dalam mayuh macham bidang teknikal enggau vokasional ba hari kedua konvokesyen nya.-TVS
