BANGI, 8 Sept: Urung 1,869 iku kaban polis enggau pegawai Polis Diraja Malaysia (PDRM) diukum bekau ari bemacham penyalah kenyau ari taun nyin kemari nyentuk Ogos tu tadi.
Sapit Kepala Polis Menua, Datuk Seri Ayob Khan Mydin Pitchay madah ari penyampau nya, 175 kaban polis enggau pegawai udah dibuai kereja ngaul penyalah baka mejal, gian dadah enggau bisi kaul enggau sindiket.
”Mayuh atur udah digaga, atur aja kami nadai ngemesaika pekara ngagai media.
Mayuh atur udah dipejalaika.
“Atur kami konsisten enggau sepanjai maya sereta nadai belembut ngagai sebarang pegawai tauka kaban polis ke bisi kaul ngereja penyalah,” ku iya.
Iya madah munyi nya maya aum media pengudah Pengawa Tamat Latih enggau Nyuaka Setipikit Inspektor Kor Volunteer Pelapis Polis Siswa Siswi (Suksis) Universiti Perintah Ke-20 di Universiti Kebangsaan Malaysia, kemari.
Datuk Seri Ayob Khan madah antara atur ke digaga dikena mutarka isu ngereja penyalah iya nya besumpah beresi nadai makai suap, tis integriti enggau nitihka Sistem Nyaga Disiplin enggau Dadah.
Kelimpah ari nya, Opis Integriti enggau Pemekuh Standard Bukit Aman bisi bejalaika pengawa meresa ba luar opis lalu neritka atur ngagai supervisor ke puntan nyaga kaban dibaruh jaga sida bekaul ‘Peraturan 3C Peraturan-Peraturan Pegawai Awam (Kelakuan dan Tatatertib) 1993’.
Naka tu, 50 supervisor udah diteritka atur dibaruh udang-undang nya kelimpah ngaga profiling ngagai kaban polis sereta pegawai ke idup kaya raya.-TVS
