BETONG, 7 Sept: Ejensi Pengelikun Rama (PERKESO) Pampang Sri Aman nyelinting urung 1,000 iku raban indu gawa rumah ari menua Sri Aman nyadi pemayar (kaban baru) Skim Pengelikun Rama Gawa Rumah (SKSSR) ungkup taun tu.
Pegawai Eksekutif PERKESO Sri Aman Zamari Rajali Rajak madah naka tu bisi 6, 300 pemyara ke agi aktif dilindung nengah atur mayar volunteer sereta bantu perintah dibaruh skim nya di Sri Aman.
“Penyampau diselinting ungkup gawa kediri (nyadi pemayar) ba PERKESO diatu iya nya 1,000 iku.
“Tang bepelasarka rikod ngagai sida ke bekaul ngelui timpuh ke udah ditetapka dibaru Skim Gawa Rumah iya nya bisi dua skim sekalika nya sechara volunteer tauka nengah bantu ari perintah penuh.
“Nyadi ungkup taun tu nengah bantu perintah di bagi menua Sri Aman aja penyampau sida ke udah mayar lebih ari 6,300,” ku iya.
Iya mansutka penerang nya pengudah Program Licha diatur PERKESO Sri Aman begulai enggau Raban Gawa Rumah Kampung Tengah Betong ditu, kemari.
Ku tandu iya, rikod nya bepelasarka sida ke nyadi pemayar ngembuan bantu ari e-Kasih enggau I-Suri KWSP.
Nya alai, iya madah raban sida deka terus chakah ngelakuka skim-skim ke bisi disediaka PERKESO ngambika ditemu mensia mayuh ke nguan menua Sri Aman.
Ku terang iya, program nya betuju dikena nentuka semua renggat komuniti bela dilindung PERKESO seraya meri penyedar pasal pemesai guna nyadi kaban PERKESO.
Pekara nya ku iya dikena ngamatka juluk perintah narak komuniti awakka enda kelalu bepanggai ngagai bantu ari perintah aja tang ari segi perubat enggau pemaik bukai nyema sida bisi dituntung penusah ke enda disadang.
Nitihka penerang PERKESO Sri Aman naka tu udah bejalaika 46 program ngaul komuniti ba Sri Aman nyengkaum siti program ke pemadu baru diatur ngaul raban gawa rumah ari Kampung Tengah Betong.-TVS
