KOTA SAMARAHAN, 7 Sept: Menteri Nembiak, Lumba Enggau Pemansang Pedagang Sarawak, Dato Sri Abdul Karim Rahman Hamzah meri tabi puji ngagai atlit angkat berat Sarawak, Bonnie Bunyau Gustin ti udah menang midul emas kedua ungkup kontinjen Malaysia sereta mechahka rikod dunya ba lumba Paralimpik Paris 2024.
Atlit Sarawak ke beumur 25 taun nya mechahka rikod dunya baru enggau pemerat 232kg ba pekit angkat berat kategori lelaki 72 kg.
“Aku ngarika rayat Sarawak meri terima kasih enggau tabi puji laban udah meri siti pemujur ke besai reti ngagai Malaysia enggau tanah Sarawak,” ku iya.
Nangkan ke nya, Menteri Pemansang Orang Indu, Nembiak Mit Enggau Pengelantang Komuniti Sarawak, Dato Sri Fatimah Abdullah mega mantaika pengaga ati ba pemujur Bonnie.
“Udah tentu nya deka meri peransang sereta semangat tinggi ba raban atlit kitai enggau kitai ngarap tu deka ngangkatka agi semangat ngambika sida ulih nyadi champion dalam achara diri empu.
“Kitai mega deka Sarawak sekali agi nyadi champion bagi para SUKMA taja alah enggau Sabah taun dulu suba.
“Nyadi tabi puji ngagai Bonnie, kami chukup gaga enggau pemujur anak Sarawak tu,” ku iya.
Iya mansutka jaku nya pengudah ngulu Pengerami Ngintu Hari Pengada Rasmi Yang Di-Pertuan Agong Sultan Ibrahim Sultan Iskandar Di Masjid Al-Muttaqin, Kota Samarahan kemari.
Pengerami nya dipenyadika Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar enggau Bini Toh Puan Fauziah Sanusi.
Sama bisi datai Menteri Utiliti Enggau Telekomunikasyen Sarawak Dato Sri Julaihi Narawi sereta Sapit Iya Datuk Dr. Abdul Rahman Junaidi, Adun Muara Tuang Dato Idris Buang enggau Tuai Dibasa Kaunsil Islam Sarawak Datu Misnu Taha.-TVS
