BANGKOK, 7 Sept: Siti palan dikena ngelakuka produk Sarawak patut ditumbuhka di Thailand baka di Singapore nengah penumbuh Opis Dagang enggau Dagang Temuai Sarawak (STATOS).
Sapit Premier Sarawak, Datuk Amar Douglas Uggah Embas madahka, ungkup tuju nya kerejasama rat begulai enggau opis duta malaysia di thailand dalam bidang nya patut dikemerat udah tu.
Ku iya nerang, tu sebagi ari langkah rapat perintah dalam ngangkatka asil penatai pemisi raban pedagang tauka pemekuh produk bepelasarka utai tanam di Sarawak.
“Kami endang deka enggau ngiga chara baka ni deka ngangkatka penatai pemisi raban pekebun kami di Sarawak ti udah diaku nyadi wilayah bepenatai pemisi tinggi.
“Nya alai, ba BDDA urung 70 peratus agi betapi (penanggul) dikena ngangkatka penatai pemisi lalu ba awak ke sama sida ngembuan aset, tanah enggau orang ti bebendar gawa tang bisi penanggul dalam aspek makit enggau model dagang,” ku iya.
Uggah ke mega Chairman Komiti PEMANDU BDDA madah munyi nya rambau bejaku maya penemuai sida ke Phenix Mall ditu kemari.
Dikena ngangkatka agi bungkur produk Sarawak di Thailand ku iya, kerejasama nengah Ejensi Pemansang Bagi Menua Betong (BDDA) patut diperundingka nyadi sukung ngagai produk pemansut raban pedagang tani di bagi menua Betong enggau nguna pemaik puncha besai ti dikembuan Phenix Mall.
Hab jual besai Phenix Mall ba Jalai Petchaburi berengkah beoperasyen kenyau bulan June 2024 sereta disikap enggau kereban moden nyentuk lalu ngujungka iya nyadi palan bejual pemakai global pemadu besai ti tebilang ba pelilih Pratunam.
Penatai deligit BDDA ti diuluka Uggah ngagai Phenix Mall nya dikelaluka Direktor Kunsi Strategik enggau Direktor Pengatur Phenix Mall, Chokdee Wisansing enggau Assawin Kumvang sereta ke bukai.
Penemuai ke Phenix Mall nya nyadi palan kepenudi dilawa bepelasarka tusun pejalai raban deligit Komiti PEMANDU BDDA Nemuai Seraya Belajar ke Bangkok.-TVS
