KUCHING, 6 Sept: Jaguh angkat berat Paralimpik menua Bonnie Bunyau Gustin, 25 taun lemai tu tadi sekali agi ngemegahka nama Malaysia pengudah mujur nempa rikod baru dunya lalu ngujungka iya menang midul emas ba Lumba Paralimpik Paris nengah pemerat 232 kilogram (kg).
Rikod baru nya madamka rikod lama 228 kg ke dipenggi Bonnie empu iya nya ditempa maya Lumba Paralimpik di Tokyo, Jipun taun 2020.
Pemujur nya ngujungka kali kedua menira Malaysia diangkat ba bumi Perancis ngelai atlit udah teulih midul emas nangkan emas keterubah diulih nengah jaguh para badminton menua Cheah Liek Hou.
Dulu agi ari tu Liek Hou udah ngalahka pemain Indonesia Suryo Nugroho ba pekit kepenudi enggau poin 21-13, 21-15 ba achara badminton solo lelaki SU5 (timpang fizikal) kena malam Hari Satu tu tadi.
Ba pekit ke diatur ba Porte de La Chapplle Arena nya Bonnie anak Dayak Bidayuh asal ari Kampung Baru Mawang, Serian dipeda lantang ngangkat pemerat 226 kg sebedau ke ditambah pemerat ngagai 232 kg ti ngenukuka iya nyadi pemenang midul emas.
Midul pirak pekit nya dipenggi atlit ari menua China, Hu Peng ke semina ulih teangkatka pemerat naka 214 kg sereta midul engkeraju dipenggi atlit Itali, Donato Telesca ke ngangkatka pemerat naka 213 kg.
Naka tu kontinjen Malaysia udah tegumpulka empat iti midul iya nya dua emas nengah Bonnie enggau Liek Hou, siti midul pirak diulih Muhammad Ziyad Zolkefli ba achara nikauka peluru lelaki F20 (timpang intelektual) enggau siti midul engkeraju nengah Eddy Bernard ba achara 100 meter lelaki T44 (timpang fizikal).
Ba pekit angkat berat kelimpah Bonnie, dua iku agi atlit ari Sarawak bela dikeandal ngulihka sebarang midul ungkup kontinjen Malaysia iya nya Nicodemus Manggoi Moses kategori nyentuk 97 kg enggau Jong Yee Kee kategori nyentuk 107 kg.
Kelimpah ari sida tiga, Malaysia bisi nganjung 27 agi atlit bukai bela ngarika menua ba Lumba Paralimpik Paris iya nya ba para olahraga ngaul enam iku atlit iya nya Datuk Abdul Latif Romly ba achara merejuk jauh, Muhammad Nazmi Nasri (merejuk jauh), Jonathan Wong Kar Gee (merejuk jauh), Ziyad (nikauka peluru), Eddy (lumba 100 meter) enggau Muhammad Ammar Aiman bin Nor Azmi (lumba 400 meter).
Udah nya achara para lumba ensikal bisi tiga iku iya nya Nurul Suhada Zainal ba kategori pilot, Nur Suraiya binti Muhamad Zamri (jalai raya enggau trek) sereta Farina Shawati binti Mohd Adnan (pilot).
Ungkup main badminton bisi lima atlit ngarika menua iya nya Liek Hou (solo), Muhamad Amin Burhanuddin (solo), Muhammad Fareez Anuar (solo), Muhham Ikhwan Ramli (beregu bekerusi ruda) enggau Noor Azwan Noorlan (beregu bekerusi ruda).
Udah nya ba achara nimbakka laja menua mega bisi nganjung tiga atlit iya nya Suresh Selvatamby (kategori recurve), Nur Jannaton Abdul Jalil (compound) enggau Daneshen Govinda Rajan (compound).
Ba achara boccia semina siku aja atlit ngarika menua iya nya Lee Chee Hong BC2 kategori solo.
Nangkan ke nya ba para tenis kerusi ruda mega ngemataka siku pengari tunggal menua iya nya Abu Samah Borhan enggau achara nyemerai bisi dua pengari iya nya Muhammad Imaan Aiman Muhammad Redzuan kategori 100 m enggau Muhammad Nur Syaiful Zulkafli ba achara 50 m, 100 m enggau 200 m.
Pekit Lumba Paralimpik 2024 di Paris udah berengkah kenyau 28 Ogos tu tadi lalu deka tembu 8 September tu.-TVS
