BINTANGOR, 5 Sept: Siku lelaki ke diripotka lenyau pengudah labuh ngagai sungai Nanga Semah, ensana ditemu udah nadai sehari tu tadi.
Tudah Raya Adam ditemu pengani Kampung Semop, Daro urung 23 kilometer ari palan jaga operasyen pukul 12.45 tengah hari tadi.
Tuai Balai Bomba enggau Penyah Penusah Bintangor, Penolong Penguasa Bomba Nicholas Belulin madah, pengawa nentuka bangkai tudah dipejalaika sida sebilik empu sebedau tubuh tudah diserah ngagai polis ungkup atur ke bekaul.
“Sebedau nya kami bejalaika pengawa ngiga ngena chara ba atas ba radius dua kilometer ari ulu enggau ili sungai ari palan iya ke diripotka lenyau,” ku iya nengah sebengkah penerang.
Nicholas madah, ripot pasal pengelenyau lelaki nya digaga sida sebilik empu ba Balai Polis Meradong.
Sebedau penusah nya, ku iya tudah bisi nurun ngagai umai ungkup besampi lalu udah nya iya dipeda bejalai nuju ke sungai ke semak laban deka mandi.
“Taja pia sejam udah nya, bini iya bisi nurun ke sungai laban deka ngiga lelaki nya tang puntan (meda ayas laki iya),” ku iya.
“Ngasaika tudah (laki) iya lenyau, dia iya berumban minta saup sida serumah sebedau ke ngaga ripot polis kira pukul 5.10 lemai,” ku iya. -TVS
