BANGKOK, 5 Sept: Raban deligit Komiti PEMANDU Ejensi Pemansang Bagi Menua Betong (BDDA) bisi nemuai seraya belajar ngagai Palan Inovasyen Pemakai Betagro (FIC) ke bepalan ba wilayah Lopburi, Thailand.
Sapit Premier Sarawak Datuk Amar Douglas Uggah Embas madah penemuai ngagai Betagro nya dikena mansik sereta belajar pasal model dagang ke diguna palan nya lebih agi sukut bekaul enggau rentayan bekal antarabansa.
Iya mega Chairman Komiti PEMANDU BDDA madah munyi nya maya dirandau pemberita TVS, ensana.
Ku iya antara bidang ke diberi perati sekumbang penemuai nya nyengkaum bakih strategik, pengawa bekunsi penerang enggau kaul kerejasama dikena nambahka rentayan pemakai lokal ke pemaik mensia mayuh lebih agi ba Betong.
Model dagang nya ku iya bepenau ungkup kerejasama dalam bidang bekunsi penerang enggau numbuhka perengkaguna rentayan bekal ba bagi menua Betong kelai meri sukung nagai pemansut lokal.
Penatai raban deligit ngagai FIC dikelaluka Mandal Presiden Palan Inovasyen Pemakai enggau Pengeluar Global Thailand Phontakom Wong Chareon, Mandal Presiden ba Opis Dagang Antarabansa Thailand Seubsaul Nimpoolsawad (Jack) enggau Penulung Mandal Presiden Opis Dagang Antarabansa menua nya sereta pegawai ke bukai.
Betagro iya nya lebih numpu ngagai bidang pemansang produk dalam rentayan bekal pemakai penuh ke dipungkal ba taun 1967 nyentuk ke diatu udah ngerikodka asil sepenyampau USD 3.15 bilion lalu penyampau pengereja pengawa 33,652 iku sereta bejalaika urung 150 perengkaguna dikena ngeluarka barang ba 35 buah serikat.-TVS
