BETONG, 2 Sept: Kaban Komiti PEMANDU Projek Inovasyen enggau Sosioekonomi Ejensi Pemansang Bagi Menua Betong (BDDA) diatu benung ‘beguro’ tauka nemuai seraya belajar pengelama seminggu ba Thailand.
Sapit Premier Sarawak Datuk Amar Douglas Uggah Embas madah, penemuai nya betuju dikena nambahka tambak penemu pasal agro betanam betupi enggau agro dagang temuai lebih agi dalam industri nginjin kelapa ari serikat tebilang menua nya ke dikumbai Thailand Coconut Company Limited ke udah mujur eksport produk kelapa bekualiti ungkup dalam enggah menua luar.
“Nyadi tim teknikal tu enti pulai ila deka terus berandau seninjik amat Residen pan bisi ditu nyadi kami deka berandau.
“Aku ngasai kitai bisi utai ke manah ditu ungkup prospek industri betanam betupi baka ke dipeda kitai ari rentayan ke bisi ditu ari segi produk, penerus, pemungkus, makit sereta proses (bekaul).
“Nyadi semua tu chukup beguna dikena kitai ngemansangka industri betanam betupi (lebih agi) ungkup sosioekonomi rayat kitai di menua Betong,” ku iya.
Uggah ke mega Chairman Komiti PEMANDU Ejensi Pemansang Bagi Menua Betong (BDDA) madah munyi nya maya dirandau TVS, Hari Satu.
Ku iya raban sida deka nemuai ke Talaad Thai siti endur ke tebilang enggau produk ladang mata enggau Or Thir Kor iya nya sebuah pasar lokal semak Bangkok.
Tandu iya, raban deligit mega dela dibai ngabas makmal nguji pemakai enggau jelu ke udah diaku dibaruh ISO/IEC 17075 ba Palan SAINS Betagro di wilayah Lopburi.
Kelimpah ari nya, raban sida mega deka dibai ngagai sebuah ladang di Chokchai enggai Saithong awakka meda kediri chara proses produk ari pengawa betanam betupi baka tusu mata, keju enggau yogurt kelimpah ngagai ladang Punawapan ke tebilang enggau produk bemacham buah lebih agi produk manggai ke bekualiti tinggi.
Penemuai nya diatur pengelama seminggu berengkah 1 September disereta enam iku kaban Komiti PEMANDU BDDA sereta dua iku Kaban Parlimen nyengkaum Sapit Menteri Pemansang Indu, Anak Mit enggau Pengelantang Komuniti Sarawak Datuk Mohd Razi Sitam, Sapit Menteri Nembiak, Lumba enggau Pemansang Pedagang Sarawak Dato Gerald Rentap Jabu enggau ke bukai.-TVS
