SRI AMAN, 1 Septembet: Penyiru Petroliam Nasional Berhad (PETRONAS) nengah Program Tanggungpengawa Rama Korporat (CSR) udah meri agih belanja ungkup ngemanah perengkaguna ba klinik menua pesisir dipuji mensia mayuh.
Sapit Menteri Dagang Antarabansa, Industri enggau Pemeranak Puku Sarawak Datuk Dr Malcolm Mussen Lamoh meri terima kasih ngagai PETRONAS laban udah milih klinik ba sitak batang ai diberi belanja dikena ngangkatka agi tikas pengidup komuniti.
Ku Kaban Kunsil Nengeri (ADUN) Batang Ai nya, PETRONAS udah bejalaika tanggungpengawa ke chukup beguna begulai enggau perintah Sarawak nyendiaka perengkaguna pengerai lebih agi ungkup klinik pengerai ba menua pesisir di selampur nengeri.
“Terima kasih mega ngagai PETRONAS laban udah meri belanja dikena ngatur program baka ke pagi tu enggau tuju program baka tu endang udah suah diatur ba endur bukai.
“Aku enggau peluang tu deka meri terima kasih ngagai PETRONAS laban udah milih batang ai nyadi siti ari endur iya nya klinik menua pesisir ke diberi perati berat,” ku iya.
Iya mansutka penemu nya maya dirandau pemberita pengudah tembu pengawa kelai nyerahka kereban perubat ngagai Klinik Batang Ai di Lubok Antu empai lama.
Program nya dikemujur nengah saup bakih kunsi iya nya Serakup Bini Bala Menteri enggau Sapit Menteri Sarawak (SABATI), seraya dikena ngangkatka agi tikas pengerai ba menua pesisir di Sarawak.
Berebak enggau nya, Dr Malcolm mega bisi nyuaka pemeri sepenyampau RM10,000 ungkup Komiti Pengelantang enggau Pengelikun Rumah Panjai Lawin dikena sida ngatur aktiviti sepanjai taun.-TVS
