LUBOK ANTU, 1 September: Operasyen Ngiga enggau Nyelamat (SAR) siku lelaki ti lemas maya mandi ba Lubok Subong Lemanak kena Hari Lima tu tadi udah diketu urung pukul 9.30 pagi tadi.
Tuai Balai Bomba enggau Penyelamat Betong, Vincent Baling Yabi madahka, pengawa SAR nya diketu pengudah tudah ke lemas iya nya Mohd Fandi Wong bin Mohd Awang Wong, beumur 20 taun nya ditemu raban SAR urung pukul 8.30 pagi Hari minggu urung 500 meter tungga ke ili Sungai Lemanak ari palan kepenudi iya dipeda lenyau.
“Urung pukul 8.30 pagi hari minggu tu tadi ba hari ketiga raban SAR tetemuka bangkai tudah ti lemas ba Lubok Subong, Sungai Lemanak ba penyauh 500 meter ari pos jaga ti dibuka ba palan penusah nyadi,” ku iya.
Iya madah munyi nya lebuh dirandau TVS ba palan penusah nyadi pengudah operasyen SAR orang lemas di Lubok Subong, Lemanak.
Ku iya madah, pendiau tubuh tudah maya ditemu agi meruan sebedau diserah ngagai raban ari Balai Polis Engkilili.
Tandu iya, niang ke asal ari Sibu nya deka dibai raban polis ngagai Sepital Sri Aman ungkup perkara bekaul.
Sebedau tu, Balai Bomba enggau Penyelamat Betong bisi nerima ripot bekaul enggau siku lelaki ke lenyau maya mandi ba Lubok Subong, Sungai Lemanak urung pukul 1.59 lemai kena Hari Lima tu tadi.
Tudah ke gawa ba sebuah restoran ba pasar Lubok Antu diripotka lenyau pengudah dibai arus sungai lebuh nguji nyemerai ke seberai sungai enggau dua iku bakih ke bukai.
Berindik ari nya, operasyen SAR terus dipejalaika balai bomba enggau penyelamat betong sereta ejensi ke bekaul sebedau sida mujur tetemuka tudah urung pukul 8.30 pagi hari minggu.-TVS
