SRI AMAN, 1 September: Kebun-kebun lada di bagi menua Sri Aman dikearap ulih diperunding nyadi palan dilawa serikat-serikat ari menua luar.
Pekara nya beduduk ari menua Sri Aman nyadi sebagi ari pelilih ke mayuh ngasilka lada bekualiti di Sarawak, ku Dato Sri Doris Sophia Brodi.
Kaban Parlimen Sri Aman nya madah nyema pekara nya ulih dikemujur raban Kaunsil Lada Malaysia (MPB) nyadi nya deka meri pemaik ngagai raban pekebun lada lebih agi ngangkatka menua Sri Aman ngambika dikelala dunya.
“Enggau peluang tu aku deka nguna pangku pengawa aku ke nyadi Kaban Parlimen Sri Aman ngarapka raban Kaunsil Lada Malaysia ulih berundingka kebun-kebun di Sri Aman nyadi palan (patut) dilawa serikat ari luar seraya ngangkatka Sri Aman (dikelala) ba mata dunya,” ku iya.
Iya madah munyi nya maya Program Negapka Pemekuh Industri Lada di Sri Aman, empai lama.
Tandu iya naka diatu bisi sekeda rumah panjai ba sri aman udah nyadi palan pemungkal projek pemansut lada premium.
Ku iya, diatu rega lada premium ke datai ari Sri Aman ulih berega manggai RM60 sekilogram.
“Aku bisi dipadahka sekeda rumah panjai ba Sri Aman udah nyadi palan pemungkal projek pengeluar lada premium tauka dikumbai kitai PPLP diatu benung chakah dipejalaika raban MPB.
“Lada premium tu enti enda salah ingat aku (iya nya) lada putih. Tadi ba baruh dedin aku chukup tekenyit laban rega lada kitai kebendar lada burak tu manggai RM60 sekilogram,” ku iya.
Iya madah munyi nya maya Program Negapka Pemekuh Industri Lada di Sri Aman, empai lama.-TVS