KUCHING, 31 Ogos: Nembiak rebak baru di Sarawak patut belajar enggau nemu nama reti kebendar buah merdeka, ku Tun Pehin Sri Dr Wan Junaidi Tuanku Jaafar.
Tuai Pemegai Menua (TYT) Nengeri Sarawak nya madah dikena ngelala enggau ngenang jasa ngulihka menua merdeka rayat Sarawak patut nemu sejarah sereta ingatka pengeransing bala tuai kelia ke udah berambun nyawa ngulihka menua merdeka.
Ku Wan Junaidi madah, penyanyu enggau pengerindu ngagai menua tu deka nyamin pengelantang, bebasaka pangan diri, beserakup enggau bebatak asur dalam semua sukut pengidup.
“Tau peda, orang ke enda nemu sejarah, enggai nemu sejarah menua, deka ngasuh semangat merdeka nyadi kusung, enti semangat kusung, nya deka ngeruga pengelantang ti udah diasai kitai ngelama tu.
“Enti kitai semua nemu sejarah, nemu sejarah, kitai deka ngembuan semengat ti tinggi kena ngemansangka menua ngagai jalai ti manah agi. Kitai deka nyadi orang ti ngembuan semengat patriotik enggau pengerindu ti dalam ngagai menua kitai,” ku iya.
Kelimpah ari nya, iya mega ngelalau genap rayat patut bekerejasama negapka ekonomi enggau ngemansangka menua Sarawak.
Udah nya, iya nangkan rayat Sarawak patut seruran bejejaga enggau pekara ari dalam sereta luar menua tu tau ngerusak penyerakup enggau pengelantang ti diasaika sida diatu.-TVS
