DEBAK, 31 Ogos: Pelajar Literasi Fungsian (PLF) ke diatur Opis Pemansang Raban Bansa (KEMAS) beguna amat dikena perintah nentuka semua raban nyengkaum orang tuai ba menua pesisir bela ngelala urup.
Sapit Menteri Pemansang Indu, Anak Mit enggau Pemansang Komuniti Sarawak Datuk Mohd Razi Sitam madah, senutuk enggau putar jeman diatu raban orang tuai mesti nemu 3M iya nya macha, nulis enggau ngira ke pemaik diri.
“Program Literasi Fungsian Versi 2.0 enggau mega Kelas Pugu iya nya ngemeratka pengelandik 3M iya nya macha, nulis enggai ngira ke endang atur positif dalam nempa raban ke udah lunggar umur tu ngambika lebih andal enggau pengulih diri nyentuk sida landik 3M lebih agi ulih macha.
“Program tu kebendar udah mandangka asil ke chukup badas dalam ngemansangka modal mensia ba menua pesisir nuju siti tikas ngambika ulih besemekih enggau mujur,” ku iya.
Iya ke mega Kaban Kunsil Nengeri (ADUN) Saribas madah munyi nya maya bejadika Pengerami Graduasi Pelajar Literasi Fungsian Versi Dua (2.0) enggau Kelas Pugu Zon Debak diatur ba Dewan Millenia Debak, kemari.
Nya alai, iya ngarapka bala penyereta program nya ulih nguna penemu ke udah dipelajar sida dikena ngemanah agi tikas pengidup lalu nemu nguna pemisi teknologi kemaya hari.
Dulu ari nya, bisi 42 iku penyereta ari dua buah genturung pendiau enggau rumah panjai di DUN Saribas nyereta kelas ke diatur kenyau bulan Januari 2022 suba.-TVS
