LUBOK ANTU, 31 Ogos: Kandang endur pengawa nyidi enggau mantu (SAR) tudah siku orang ke dipelaba lemas ba sungai Lubok Subong, Lemanak masuk hari kedua udah dikerembai tang naka pukul 5 lemai tadi pengawa SAR ngiga tudah ke lenyau agi nadai sebarang asil.
Tuai Balai Bomba enggau Penyah Penusah Betong, Penulung Penguasa Bomba (PgB) Vincent Baling Yabi madah sehari tu tadi raban sida neruska aktiviti SAR nya nyentuk ngagai dua kilometer ari palan iya dipeda kepenudi nyentuk ngagai ili Sungai Lemanak.
“Masuk hari kedua pengawa SAR ba sungai Lubok Subong ke enda jauh ari Klinik Nanga Kesit raban kami neruska pengawa begiga nyentuk ngagai dua kilometer ke ili nengah chara nyelam,” ku iya.
Iya ke mega bisi ngemataka pengawa SAR nya mansutka pekara nya ngagai TVS, sehari tu tadi.
Ku terang iya pengawa SAR bela dibantu peranak rumah panjai lalu volunteer ngasuh nguna perau sida.
Ejensi bukai ke bela nyaup pengawa SAR tu iya nya raban Polis Diraja Malaysia, raban bomba volunteer Lubok Antu, Raban Penyaga Orang Periman (APM) enggau raban Klinik Pengerai Lubok Antu.
Kemari diripotka siku lelaki udah lenyau ba sungai Lubong Subong nya.
Nitihka penerang tumu, tudah ke lenyau iya nya Mohd Fandi Wong, 20 taun asal ari Sibu gawa ba sebuah kedai makai di Pasar Lubok Antu.
Bekau ari insiden nya raban SAR terus dipejalaika ba hari ke sama sebedau ke diketu mua ke lemai ketegal ai keruh sereta deras.-TVS
