BETONG, 31 Ogos: Pengawa ngatur Pekit Lumba Ensikal baka nengah Karnival Ensikal Layar (LCC) iya nya siti pantar ke pemadu manah dikena ngadaka atlit pelapis ba lumba ensikal.
Sapit Menteri Nembiak, Lumba enggau Pemansang Pedagang Sarawak Dato Gerald Rentap Jabu madahka, pengawa ngatur pekit nya ulih meri empas ke positif ngagai pemansang lumba ensikal di wilayah tu.
“Enti nadai pantar baka tu, atlit kitai nadai bulih peneleba nyadi siku pelumba.
“Tu beguna laban lebih mayuh kitai ngatur lumba ukai semina di Sarawak di nengeri bukai pan aku ngarap sukung penuh ari Opis Menteri Nembiak, Lumba enggau Main Malaysia ngambika mayuh agi kitai ulih ngadaka atlit biak.
“Tu beguna ari sukut ungkup pemansang lumba,” ku iya.
Iya mansutka jaku nya rambau Pengerami Makai Lemai Bejadika Karnival Ensikal Layar (LCC) Edisyen Ke-6 2024 ditu malam kemari.
Udah nya, iya ke mega Kaban Kunsil Nengeri (ADUN) madah diri ngarapka mayuh agi atlit biak ba lumba ensikal masuk pekit nya ba taun ti deka datai.
Ke penerang bisi 337 iku penyereta ari 37 tim bisi ngambi bagi ba Pekit LCC serak tu ngaul dua kategori besai iya kriterium enggau jalai alun.
Berebak enggau nya, LCC 2024 ke nyendiaka perais penuh penyampau RM46, 180 lalu diatur pengelama dua hari berengkah 31 Ogos nyentuk 1 September tu.-TVS
