BAU, 29 Ogos – Bangkai siku lelaki ke dipelaba peranak Indonesia ke diripotka lenyau iya nya Yoga Anggiska, 26 taun udah mujur dibai pansut ari Gunung Tabai Bau urung pukul 3.58 lemai tadi.
Tubuh tudah agi meruan dianjung ngagai Unit Forensik Kuching ngambika ‘post mortem’ sereta disahka DNA.
Tuai Polis Pelilih Bau DSP Jawai Francis Kempas madah, sida baru nemu pasal penusah nya pengudah nerima penerang pasal pengelenyau tudah ari Opis Konsulat Republik Indonesia di Kuching, kena 23 Ogos tu tadi.
Kemari operasyen nyidi enggau mantu (SAR) tudah dipejalaika ba kandang bukit nya nengah bantu raban Opis Bomba enggau Penyah Penusah Malaysia (JBPM) Sarawak, Raban Penyaga Pengelikun Mensia Mayuh Malaysia (APM) enggau Opis Kampung Sarawak (SFC) udah nerima ripot ari Konsulat Jeneral Indonesia pasal pemidang siku peranak Indonesia ke tepekul ba Gunung Tabai kenyau 13 Ogos tu tadi.
Sebedau tu, kandang bukit nya udah ditutup sereta digazet nyadi kampung ke enda tau ditujah ditangkan kena bulan March 2021, Perintah Sarawak ngeletak gazet Gunung Tabai nyadi Taman Negara.
Taun 2003 suba, sitak Gunung Tabai udah digazet nyadi Taman Negara Dered Krian ke lalu ngujungka atur badu ngeluarka lisin ngerudi batu kapur ba endur nya.
Ke penerang mega, Taman Negara Dered Krian kala nyadi palan ngerudi batu kapur lalu ukai endur ngiga emas.-TVS