BETONG, 29 Ogos: Program Intervensi Rama Penyedar enggau Advokasyen Pelajar Seksual (KAPS) endang siti program sepanjai maya diatur Perintah Sarawak dikena nagang kes nembiak baruh umur betubuh bisi sebedau nikah.
Kaban Parlimen Betong, Dr Richard Rapu madah, beduduk ari kes nya balat ngirauka ati dia Perintah Nengeri udah netapka Rikod Pemanah Pengawa (KPI) sepenyampau 10 peratus kes nembiak betubuh mesti bisi nurun ninting taun.
“Perintah kitai nemu iya nya penanggul tauka kes betubuh bisi ba raban nembiak chukup ngirauka ati.
“Beduduk ari nya, dikena ngurangka kes tu dia perintah kitai udah netapka KPI patut bisi 10 peratus kes nurun ninting taun dibanding enggau taun-taun sebedau tu,” ku iya.
Dr Richard madah munyi nya maya Nutup Program Intervensyen Rama Penyedar enggau Advokasyen Pelajar Seksual (KAPS) renggat bagi menua Betong 2024 di Dewan Sekula Sekondari (SMK) Ulu Layar, kilah ensana.
Ku tandu iya, penyampau nya bepelasarka statistik ke dipansutka Opis Pengerai Sarawak lalu trend penyampau nembiak baruh umur betubuh bisi diperati bisi kurang kenyau ari taun 2012.
“Statistik ari Opis Pengerai Sarawak iya mandangka trend penyampau nembiak baruh umur ke betubuh bisi majak kurang kenyau taun 2012.
“Data ke disediaka ari 3,866 kes ba taun 2023 mandangka penyampau (kes) nurun 47.6 peratus bepelasarka kes baru indu ribat datai beperesa ba klinik enggau sepital ba timpuh ke sama ari 9.1 peratus ngagai 6.6 peratus iya nya ngerikod 2.5 peratus nurun,” ku iya.-TVS
