DARO, 26 Ogos: Siku lelaki bakal ba dada sepengudah kerita ke ditepan iya ngelantak pun kayu di Jalai Besai Tebaang-Daro ditu, malam tadi.
Pengari Palan Operasyen (PGO) Opis Bomba enggau Penyah Penusah Sarawak madahka, sida nerima ripot pasal penusah nya urung pukul 9.53 malam lalu nganjung tujuh iku raban Balai Bomba enggau Penyah Penusah (BBP) Daro ngagai ngesah palan penusah nyadi.
“Eksiden nya ngaul sebuah kerita Perodua Viva ditepan tudah ke beumur 38 taun udah mujur dibai pansut sebedau raban bomba datai ba palan penusah nyadi.
“Tudah ti bakal ba dada dibai ngagai sepital ngena ambulans ngambika terus diperubat,” ku iya nengah penerang berita sehari tu tadi.
Tandu iya, raban bomba semina ngaga pengawa meresa ngelingi kandang endur penusah nya nyadi.
“Pengawa meresa kerita nya mega bisi dipejalaika dikena nentuka nadai agi orang bukai dia,” ku iya.. –TVS
