DEBAK, 26 Ogos: Program Pelajar Menua Pesisir SABATI – PETROS (PPLBS-P) endang betuju narak pengerindu bala nembiak ba renggat sekula primari enggau sekondari ngambi rinduka bidang Sains.
Penyeraris Program PPLBS-P Betong Datin Hafsah Saleh madah, program nya mega nyadi pelasar dikena nembiak nyikap diri sebedau nyingkang ngagai sekondari atas.
“Tu mega dikena meransang ngambika bala madi kitai tu nyingkang ngagai sekula sekondari lebih agi sekondari atas lalu sida belajarka bidang Sains, Litericha nyadi program tu kebendar dikena narak sida nembiak rindu masuk kelas Sains,”ku iya.
Hafsah ke mega bini Sapit Menteri Pemansang Indu, Anak Mit enggau Pengelantang Komuniti Sarawak Datuk Mohd Razi Sitam madah munyi nya maya bejadika Karnival STEM di Sekula Primari (SK) Datuk Bendar Debak, empai lama.
Ku iya, kelimpah narak pengerindu nembiak ba renggat sekula primari di menua peisisir tuju program nya mega dikena nambahka penemu bala pengajar dalam ngajar enggau belajar bidang Sains.
Ku terang iya, program nya dikena nambahka penyulut bala nembiak ba mata pelajar Fizik, Kimi, Biologi enggau Matematik Tambah.
Program PPLBS-P ditumbuh kena bulan sebelas 2023 beserimbai enggau Pengerami Bejadika Galeri Laila enggau penyampau agih belanja sepenyampau sejuta ringgit.
Bisi 70 iku nembiak ari SK St Christoper Debak, SJKC Chung Hua Debak enggau SK Datuk Bandar Debak nyadi pengatur kunsi karnival nya.-TVS
