MIRI, 26 Ogos: Peluang pelajar ke sama ngagai genap iku rayat beguna dikena napi pemar dalam nyapai Juluk Pemansang ti Meruan (SDG) ke ngaul pengawa munaska penyeranta sereta pemeruan rampa menua.
Menteri Pengangkut Sarawak, Dato Sri Lee Kim Shin madahka, pelajar ke ulih diakses semua deka ngasuh komuniti lebih meretika pemesai guna SDG sereta deka begulai nyereta nyapai juluk ke udah digariska.
“Tu dikena komuniti meretika pasal nama utai ti dikumbai sdg, mensia mayuh patut diberi akses pelajar. Peluang pelajar endang beguna, maya kitai bejaku pasal pelajar, kitai mega bejaku senentang inklusiviti.
“Kitai deka semua orang diberi peluang dikena ngulihka pelajar. Tu endang beguna amat, sekalika ungkup sesiku orang, tebangkar tauka orang ari kandang menua pesisir sereta ke bukai. Endang dikemeratka dikena nentuka semua orang diberi peluang dikena ngulihka pelajar,” ku iya.
Iya bejaku munyi nya rambau Pengerami Nutup Aum Besai Juluk Pemansang ti Meruan (SDG) Borneo di Universiti Curtin, kemari.
Kelimpah ari nya, iya mega ngarap nengah pengawa randau enggau aktiviti dalam program nya deka ngujungka semua raban ulih bejalaika tanggungpengawa diri empu dikena ngangkatka kualiti pelajar ngagai mensia mayuh.
Tandu iya, tetiap raban baka institusyen pelajar, Gerempung Ukai Dikuasa Perintah (NGO) enggau sektor peribit patut ngatur program ke ulih meri empas ngagai komuniti, ngambika ulih nyapai objektif dalam SDG.-TVS
